फिफा विश्वकप २०२६ को उपाधिका लागि आज राति साविक विजेता अर्जेन्टिना र स्पेनबीच रोमाञ्चक भिडन्त हुँदैछ। अमेरिकाको न्यु जर्सीस्थित मेटलाइफ स्टेडियममा हुने फाइनलमा लियोनल मेसीको कप्तानीमा रहेको अर्जेन्टिना लगातार दोस्रो पटक विश्व च्याम्पियन बन्ने लक्ष्यसहित मैदान उत्रँदैछ भने स्पेन १६ वर्षपछि पुनः विश्वकपको ट्रफी उचाल्ने योजनामा छ।
अर्जेन्टिना समग्रमा चौथो पटक विश्वकप उपाधि जित्ने अभियानमा छ। यसअघि उसले सन् १९७८, १९८६ र २०२२ मा विश्वकप जितेको थियो। सन् २०२२ को कतार विश्वकप जितेको अर्जेन्टिना यसपटक पनि उत्कृष्ट लयमा रहेको छ।
यता, स्पेनले सन् २०१० पछि दोस्रो पटक विश्वकप उपाधि जित्ने अवसर पाएको हो। तीन लगातार संस्करणमा अन्तिम १६ भन्दा माथि पुग्न नसकेको स्पेनले युवा खेलाडीलाई प्राथमिकता दिएपछि पछिल्ला वर्षमा टोलीले प्रभावशाली पुनरागमन गरेको छ।
प्रशिक्षक लुइस डी ला फुइन्टेको नेतृत्वमा रहेको स्पेनले कप्तान रोड्रीसहित युवा र अनुभवी खेलाडीको मिश्रणबाट बलियो टोली तयार पारेको छ। छोटो पास, तीव्र खेल र मिडफिल्ड नियन्त्रण स्पेनको मुख्य रणनीति हुनेछ। फाइनलअघि प्रशिक्षक डी ला फुइन्टेले दुवै टोलीमा उत्कृष्ट खेलाडी रहेको उल्लेख गर्दै अर्जेन्टिनाविरुद्धको खेल प्रतिस्पर्धात्मक हुने बताएका छन्।
“फाइनलमा पुगेका दुवै टोली उत्कृष्ट छन्। दुवैसँग युवा स्टार र अनुभवी खेलाडी छन्। हामी जित्नकै लागि मैदानमा उत्रनेछौँ,” उनले भने।
अर्जेन्टिना भने आफ्नो अपराजित यात्रा कायम राख्दै उपाधि रक्षा गर्ने लक्ष्यमा छ। टोलीको मुख्य भरोसा कप्तान मेसीमाथि रहनेछ। आठ पटक बालोन डी’ओर जितेका मेसीले प्रतियोगितामा उत्कृष्ट प्रदर्शन गर्दै आएका छन्। अर्जेन्टिनाका प्रशिक्षक लियोनल स्कालोनीले मेसी फाइनलका लागि पूर्ण रूपमा तयार रहेको बताएका छन्।
“मेसी इतिहासकै उत्कृष्ट खेलाडीमध्ये एक हुन्। उनले छैटौँ विश्वकप खेलिरहेका छन् र टोलीका लागि निर्णायक भूमिका खेलिरहेका छन्,” स्कालोनीले भने।
फाइनलअघि दुवै टोलीले सेमिफाइनलमा प्रभावशाली जित निकालेका थिए। स्पेनले फ्रान्सलाई २–० गोलले पराजित गर्दै फाइनल यात्रा तय गरेको थियो भने अर्जेन्टिनाले इङ्ल्यान्डलाई २–१ ले हराउँदै उपाधि भिडन्तमा स्थान बनाएको हो।
अनुभव र नयाँ पुस्ताको ऊर्जाबीच हुने यो फाइनलमा मेसीको नेतृत्वमा रहेको अर्जेन्टिना र रोड्रीको कप्तानीमा रहेको स्पेनबीचको प्रतिस्पर्धाले विश्व फुटबलका समर्थकलाई रोमाञ्चित बनाउने अपेक्षा गरिएको छ।
