परिवारको जीवन पाँच वर्षअघि एकाएक फेरियो । बुबाले आँखाको ज्योति गुमाए । त्यससँगै घरको मुख्य आम्दानी पनि रोकियो । परिवारलाई थामिरहेको एउटा बलियो खम्बा ढलेपछि जिम्मेवारीको भारी विस्तारै गणेश र उनका दाजुको काँधमा आयो ।
२६ असार, काठमाडौं । काठमाडौंको बालाजु हाइटस्थित कोठामा दाजु मदन नेपाली बिहीबार बिहानै उठिसकेका थिए । भान्सामा अघिल्लो रात किनेर ल्याएको खसीको खुट्टा थियो । बिहीबार त्यसलाई पकाएर सबैले सँगै खाने योजना थियो । तर त्यो बिहान कसैलाई कहाँ थाहा थियो र ! त्यो खसीको खुट्टा परिवारको खुसीको खाना होइन, जीवनभर बिर्सन नसकिने एउटा दुःखद सम्झना बन्नेछ ।
बुधबार दिउँसो मात्रै गणेश नेपाली श्रीमतीसँग दाजुको कोठामा आएका थिए । मुगुको दुर्गम गाउँबाट काठमाडौं आएका दाजुभाइबीच भेटघाट भइरहन्थ्यो । गणेश भने श्रीमती र छोरीसँग भक्तपुरको कमलविनायकमा बस्थे । उनीहरूको आर्थिक अवस्था राम्रो थिएन ।
